الزبالة للجميع دى مش شتيمة ده أقوى إنتاج قومى شوف أنت لما شعب كيانه 75 مليون نسمة وكله بينتج زبالة حتى الأطفال المولودين يبقى الناتج أد إيه تاريخ الزبالة فى مصر يرجع لعهد الأسر المالكة ويمكن عهد الديناصورات ما هو أكيد طول ما فى بشر يبقى فى زبالة إرتباط البشر بالزبالة إرتباط وثيق مش عارف ليه الناس معتقدة فى مصر إن الشارع صفيحة زبالة كبيرة ولو فى إيدك أى حاجة أرميها فى الشارع حتى لو عيل صغير وعاوز تخلص منه أرميه فى الشارع واحدة ست قتلت جوزها وقطعته حتت وحطته فى أكياس زبالة ورمته فى الشارع أترك الجزء الأسود إنها قتلته وقطعته المهم أنها حطته فى أكياس الزبالة وبرضه رمته فى الشارع يا عينى على النظام ولو واحد ضميره أنبه وحس أن الشارع مش المفروض يبقى مزبلة وحط الورقة اللى فى إيده فى جيبه لغاية لما يلاقى صندوق زبالة ضميره يصحى بسرعة ويقول إيه الهبل ده كل الناس بترمى فى الشارع إشمعنى أنا حتى الناس بقى عندها إنتماء للزبالة وممكن جدا تلاقى واحد بيوصف العنوان لواحد ويقوله فى شارع فلان الفلانى أترك أول كوم زبالة وأدخل شمال حتلاقى سوبرماركت على الناصية قدامه كوم زبااااااالة كبير حنتظرك عنده أوقات كتير بحس إن الناس بتتعمد ترمى الزبالة فى الشارع بالعند فى الحكومة ما هى صحيح الحكومة فرضت علينا رسوم زبالة فالناس بقت ترمى وتزبل الشارع وتقولك بفلوسى أنا دافع رسوم ولا صناديق الزبالة بتاعتنا غير اللى بنشوفها فى الدول المتحضرة خالص فى دول أوروبا تحط المياه فى صندوق الزبالة تتعقم ومتفهمش بقى إحنا اللى مش منظفين الصناديق بتاعتنا ولا الشركة الأجنبية اللى مستهونة بينا ولا ده جزء من مشروع الزبالة الذكية ده غير طبعا الزبالة الألكترونية ودى عبارة عن الأجهزة الكهربائية وأجهزة الكمبيوتر والتليفونات وخلافه اللى بتستغنى عنها الدول الغنية وترميها فى صناديق الزبالة الكبيرة اللى هى بعض الدول الفقيرة الغلبانة بدون ذكر أسماؤها على فكرة بقى فى أكوام زبالة بتنافس الهرم الأكبر طيب نعمل إيه نعمل إيه بس لقيتها نعمل وزارة للزبالة ويبقى عندنا وزير الزبالة وطبعا محدش حيرضى ولو رضى حيعمل إيه يعنى ما إحنا عندنا وزارة إقتصاد ومعندناش إقتصاد يبقى نقتل الناس علشان تبطل ترمى زبالة مش حنقدر عليهم حاولنا نموتهم عن طريق حوادث القطارات والعبارات والهجر الغير شرعية وإرتفاع الأسعار ومبقوش لاقين اللقمة وبرضه مفيش فايدة أقولكم نفتح خرم فى الهرم من فوق ونعمله مقلب زبالة عمومى تصدقوا مش حيقضى برضه والله أنا تعبت لكن كل اللى أنا خايف منه إنه إحتمال أسم مصر يتغير من أرض الكنانة إلى أرض القمامة والأن أحبتى فى الله أنا أستغيث بكم جميعا ماذا نفعل قبل فوات الأوان ملحوظة واجب توضيحها ما زال هناك ناس تعرف معنى النظافة نريد منها المساعدة وشكر